هناك أمل دوما فلا تيأس

اليوم أنا في يومي ال ٩٣ من التعافي . بعد إدمان لمدة ٧ سنين كنت زي المربوط بسلسلة حول رقبته بتجرني للجحيم ، رغباتي كانت بتتغير و بشتهي حاجات مش شبهي بشتهي أفعال و ممارسات لا تُرضي ربنا و لا يقبلها العقل و لا الفطرة البشرية
A+ A-

الْحَمْدُ لِلَّهِ الَّذِي هَدَانَا لِهَٰذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ 

اليوم أنا في يومي ال ٩٣ من التعافي .

بعد إدمان لمدة ٧ سنين كنت زي المربوط بسلسلة حول رقبته بتجرني للجحيم ، رغباتي كانت بتتغير و بشتهي حاجات مش شبهي بشتهي أفعال و ممارسات لا تُرضي ربنا و لا يقبلها العقل و لا الفطرة البشرية و لا أي شريكة حياة ترضى بيها و ترضى أنها تكون زوجة لشخص يمارس معاه الحاجات الحيوانية دي  ، الإباحية كانت بتشوه فطرتي و عقلي و بتحولني بالتدريج لكائن همه شهوته و لا يحكم عقله ، لكن الحمد لله أنه أنقذني من المستقنع دا و شاء سبحانه و تعالى أن أترك الذنب و القاذورات دي كلها و قدرت بفضله و كرمه أخلص رحلة التسعين يوم .

 رجعتلي ثقتي في نفسي و رجعلي تركيزي و شخصيتي و صحتي الجسدية و النفسية و إحساسي بإحترامي لنفسي و قدرتي على التحكم في نفسي و إني أقول لأ للإباحية..

إحساس تركها لا يوصف بعد إدمان كل الوقت دا  اخيراً عملتها و انتهت رحلة ال٩٠ يوم بتاعتي بس رحلة أني مرجعلهاش تاني بدأت و حرصي لسه مكمل بفضل الله ️️. 

شوية حاجات عملتها لعلكم تستفيدوا منها يا إخوتي :- 

في رحلة ترك الإباحية لازم تحاربها ب ٣ جوانب مع بعض الجانب الديني بأنك تلتزم بالعبادات و الصلاة  و الجانب العلمي بأنك تقرا كتب عن اخطار الإباحية و تقرا بوستات واعي المفيدة اللي بتعرفك مدى خطورة الإباحية و الجانب العملي هو أنك تتحرك و تسعى و تبذل مجهود عشان تتركها بوضع خطط و احتياطات و هكذا 

الإنشغال و قتل الفراغ :- الفراغ مهلكة يا اخواتي املوا يومكم بالأنشطة و الحركة و الأعمال متسبوش ساعة فيها فاضية .

قال تعالى "" إِنَّ الْحَسَنَاتِ يُذْهِبْنَ السَّيِّئَاتِ "" حاولوا تزودوا أعمال صالحة و حسنات عشان تقضي على الذنوب و العادات السيئة دي و اعرف أن كل طاعة بتزودها في حياتك بتضيع قدامها معصية و كل طاعة بتزودها ربنا بيسهلك الطريق لترك الإباحية 

راقب نفسك يوميا :- نصيحة التزمت بيها يوميا هي إني عملت كراسة و كنت بكتب فيها إرشادات و نصايح باخدها من بويتات واعي و الفيديوهات و اي حاجة ضد الإباحية و بكتب أوقات ضعفي و تاريخ اليوم و دا اليوم الكام من الترك و كل حاجة 

حاجة كمان كنت ملتزم بسماع سلسلة تعافي من الإباحية و بودكاست و قراءة كتب عن أخطار و أضرار الإباحية  في التسعين يوم كانوا بيزودوا معلوماتي العلمية و بتذكرني ديما بمدى الكارثة اللي أنا فيها

لازم تلتزم بالصلاة و ورد قرآني كل يوم القرآن بيطهر القلب و بيغسله من المعاصي و الذنوب اللي فيه أنا قلبي متصلحش غير بعد ما قربت من كتاب ربنا و بدأت احفظه و اقرا ورد كل يوم بفضل الله لازم تستعينوا بالله و تقروا كتابه الكريم .

و أهم حاجة إخلاص النية لله عشان ربنا يوفقك و يساعدك الإفتقار لله و الإستعانة به و تصدق من جواك إنك مش هتبطل غير بفضله و كرمه مش بقدرتك و الدعاء ديما كنت ملتزم بدعاء "" اللهم اغفر ذنبي و حصّن فرجي و طهر قلبي "" و دا الدعاء المعروف عن النبي لما دعا به للشاب اللي قاله أذن لي في الزنا بس حولته من صغية الغائب لصيغة المتكلم . 

ربنا يوفقكم و تكملوا فترة التعافي على خير و يرزقكم لذة لحظة ترك الإباحية و إتمام الرحلة بنجاح ️️.

و الحمد لله حمداً طيباً كثيراً مباركاً  ️️️"

  • اسم الكاتب: متعافي
  • اسم الناشر: aya gamal
  • تاريخ النشر: 9 ديسمبر 2023
  • عدد المشاهدات: 465
  • عدد المهتمين: 55
  • الاكثر قراءة
  • اخترنا لك